رواية للقدر رأي تاني(كاملة حتى الفصل الاخير)بقلم ايه دياب
و مشي لحد ما وصلنا لعربيته
فتح الباب و اتكلم بعصبية
اركبي
لا شكرا هروح لوحدي
قولتلك اركبي
ركبت معاه وفضلنا فترة ساكتين بعدها قرر يقطع الصمت دا و اتكلم
هو دا اللي اتجوز صحبتك
هزيت راسي بنفي
لأ
امال مين دا
ممكن مجاوبش
براحتك
اتنهدت وانا بسند راسي على الشباك
انتي كويسه
غمضت عيني وانا بحاول اكتم دموعي لكنها نزلت برضو
انا اللي كنت غلط... انا اللي غلطانه
وقف العربية و بصلي باهتمام من غير ما ينطق حرف
هو كلامه صح انا اللي غلطانه... انا كنت انانية معاه
طارق كان بيحبني انا اللي وصلتنا لكدا
قولت كلامي بعياط و مبقتش عارفه اتحكم في نفسي
طارق كان صح عمري ما فكرت في الموضوع من وجهة نظره
كنت دايما شايفة انه انا اللي معايا الحق كنت مغلطاه
من غير ما افهم منه انا ازاي كنت وحشة معاه كدا
قاطع تفكيري امير و هو بيناولني منديل
اهدي يا خديجة
مسحت وشي و اتكلمت بإحراج
انا اسفة... انا مش عارفه دا حصل ازاي
لقيته طبطب عليا وهو بيبتسم
انتي كنتي بتقولي عليا امير المجنون صح
انا اسفة يا مستر أمير... انااا...
قاطعني وهو بيدور العربية
تيجي اوريكي الجنون اللي بجد
ساق العربية بسرعة جدا و انا كنت بتشاهد في الكرسي اللي جمبه
مستر امير هدي السرعة شويه مينفعش كدا
ضحك و زاد السرعة اكتر
يخربيتك
بصلي بصدمة
انتي قولتي ايه
انا... انا اسفة بص قدامك هنموت
ضحك مرة تانية و فضل ماشي بنفس السرعة لحد ما وصلنا للبحر
اخدت نفس اول ما وقف العربية
ايدا انا لسه عايشة بجد
انزلي
ايه هترميني في البحر المرة دي
انزلي يا خديجة انزلي
نزلنا من العربية و هو مشي ناحية البحر فضلت واقفة مكاني
لقيته بيشاولي امشي
اقلعي
افندم
قولتها وانا ببصله بصدمة
ضرب جبهته بكف ايده
الشوز يا خديجة
هاااا... اااه الشوز
ضحك و وطى يخلع جزمته و رفع البنطلون و نزل الماية
عملت زيه و مشيت وراه
انت بتعمل ايه
مد ليا ايديه وابتسم
تسمحيلي نكمل رقصتنا
رقصتنا
افتكرت لما.........
تسمحيلي بالرقصة دي
بصتله بعدم فهم شاور بإيديه على ودانه
سامعة
فين دي
مش مهم انا سامعها
قالها وهو بيشدني عليه و بيرقص
لا دا انت مجنون بجد
ضحك وهو بيلفني وبيكمل رقص
بطلي كلام و استمعتي باللحظة
مسكت كتفه و انا بسند عليه
كان نفسي استمتع بس انا دوخت
احم... حيث كدا نطلع على المستشفى
ضحكت بعد ما افتكرت اليوم دا
مادام ضحكتي يبقى افتكرتي... يلا
بس...
عارف المزيكا... ثواني
طلع موبايله و شغل ميوزك و مد ايديه ليا
مسكت ايديه و انا بضحك
مجنون
بس قمر خلينا متفقين
قالها وهو بيغمز وحقيقي مشفتش اجن من كدا
رقصنا لحد المزيكا ما خلصت و فجأة لقيته بيرش عليا ماية
امير لااااااا
ولا حياة لمن تنادي طبعا كمل لحد ما غرقني
فضلنا نلعب بالماية و نضحك
كنت بضحك من قلبي وانا معاه
نساني كل اللي حصل من شويه
واقترن لتاني مرة بذكري بشعة وحولها لذكرى مبهجة اوي
انا هروح ازاي كدا
قولتها و انا ببص لهدومي اللي بقت كلها ماية
شدني من ايدي وهو بيضحك
يتبع.........البارت السابع
تعالي
ركبنا العربية و لقيته وقف قدام مول كبير
هنعمل ايه هنا
انزلي بس
نزلت معاه ودخلنا المول لقيته بيختارلي فستان
جربيه كدا
ايه دا
هدومك غرقانة اكيد مش هتروحي كدا
بس...
ايه مش عاجبك... شوفي دا كدا طيب
لا لا عاجبني هروح اجربه
تمام... هشوف حاجه ليا عبال ما تخلصي
دخلت اقيس الفستان وحقيقي كان تحفة كأنه متفصل عليا
لكن بصيت على التيكت لقيته بنص مرتبي حرفيا
كنت لسه هغيره لقيت حد بيخبط عليا
نعم
استاذة خديجة ممكن تخلصي امير بيه مستنيكي من بدري
هي عرفت ان أمير يبقى بيه منين هو مشهور للدرجادي
ايدا ثواني هو امير يبقى مين في الشركة اصلا
طلعت الموبايل و جيت اعمل سيرش على جوجل
بس انا حتى معرفش هو اسمه امير ايه
سرحت في افكاري لحد ما لقيت الباب بيخبط مرة تانية
فتحت الباب وانا فكراها البنت اللي نادتني من شويه
لقيت امير في وشي
واااااو
طلعت منه وهو بيسقف اول ما شافني بالفستان
مش حلو
قولتهاا بسرعه وجيت اقفل الباب لقيته سده برجله
مش حلو ايه انتي بتهزري
شدني من ايدي و قال للبنت اللي في المحل تحطلي هدومي اللي جيت بيها في شنطة
وقفت
ولا اعيط على نص المرتب اللي ضاع
لقيت انعكاس أمير في المرايا بيتسملي و هو واقف ورايا
لا اراديا لقتني ببادله الإبتسامة
قرب عليا وهمس في ودني
علفكرة طالعة زي القمر
احم... ميرسي
نزلنا تحت عشان نحاسب و نطلع لكن اتفاجئت انه عدا الكاشير و مكمل مشي عادي
امير الحساب
حساب ايه
شاورت بإيدي على اللبس لقيته ضحك
احم... هو انا مقولتش ليكي ان المول دا بتاعي
ايييه
هز اكتافه بضحك
يلا بينا
لا مش همشي غير لما ادفع
اعتبريه هدية
وانا اعرفك منين عشان اقبل منك هدية
اصلا
هزيت راسي ب ايوا
مد ايديه يسلم عليا
انا امير الملاح المدير التنفيذي للشركة اللي حضرتك بتشتغلي فيها
المدير التنفيذي
قولتها وانا بحط ايدي على بوقي بصدمة
شد ايدي و سلم عليا بضحك
يلا نمشي بقا
لا لازم ادفع الحساب الاول
جريت على الكاشير و انا بطلع الفيزا لكن ملقتهاش
وحاجة في منتهى الاحراج بجد
شكلك نسيتها يلا بقا
لا هي في الشنطة انا متأكدة ثواني بس
قلبت الشنطة كلها على مكتب الكاشير
لكن من غير فايدة ملقتش حاجه
مش نمشي بقا ولا ايه
بس....
خد مني الشنطة و مسك ايدي ومشي بيا على برا
ايه رأيك نتغدا سوا
لا انا لازم اروح
طيب اركبي اوصلك يلا
لا انا هروح لوحدي
قولتها و انا بوقف تاكسي
خديجة
نادي عليا قبل ما اركب و فضل باصص ليا كأنه بيفتكر حاجه
قبل 6 سنين
طارق ايه رأيك في العربيه دي
هاااااا
هاااا ايه.. يبني بقولك ايه رأيك في العربيه دي
ثواني يا امير بس
بتكلم خديجة كالعادة.. طيب مش ناوي توريهالي انا صحبك علفكره
من حقي اتعرف على مراتك المستقبلية
مش هخليك تشوفها عارف ليه
ليه
عشان لو شوفتها هتحبها
ليه هو حد قالك اني واطي
مش واطي بس خديجة دي زي السحر مستحيل حد يشوفها و ميحبهاش و انا بغير عليها من عيون الناس
ايه = دا يا طارق الله يقرفك... اقفل معاها طيب و ركز شويه كدا عايزك
لا ما انا مش بكلمها اصلا
امال بتعمل ايه
واحدة جديدة
يعني ايه انت بتهزر
لا والله بكلم واحدة جديده فعلا
ثواني خديجة بترن
الو يا خديجة
انت
في الشغل هخلص واكلمك
انت متغير معايا بقالك فترة و عمال تتحجج بالشغل
انا مش ناقص ضغط يا خديجة اقفلي دلوقتي
دلوقتي انا بقيت ضغط
يبنتي ارحميني بقا
انت لسه منزل استوري و مردتش عليا... انت ملاحظ انك بقيت تتجاهلني
لا دا انتي دماغك تعبانه بجد
طارق انت قفلت في وشها
اممم
انت بتعمل كدا ليه انا كنت فاكرك بتحبها بجد
ما انا بحبها بجد برضو
انت عبيط يبني... بتحبها و بتعاملها كدا امال لو بتكرهها هتعمل ايه
امير فكك من الحورات دي... هااا كنت عايز توريني ايه
طارق متبقاش غبي متضيعيش خديجة منك
انا تعبت منها و من دماغها مبقتش عارف اتعامل معاها
اقعدوا مع بعض و اتفاهموا بس متعملش حاجات تخليك تخسرها
وتندم بعدين
فكك يا امير .. وريني العربية اللي بتقول عليها كدا
ناديت عليه بصلي بانتباه كأني قطعت تفكيره
خديجة انتي مكنتيش غلط..... متخليش حد يقنعك انك غلط
انتي اتأذيتي كتير متنسيش دا
هزيت راسي بإبتسامة وركبت التاكسي
كلامه هون عليا الحرب اللي كانت دايرة جوايا
انا كمان اتأذيت و مينفعش اخلي طارق يقنعني بعكس دا
انت راجع من السفر ناوي على ايه يا امير
طارق ازيك معرفتش اسلم عليك كويس امبارح
انت عايز ايه من خديجة يا أمير
تؤ تؤ عيب اسمها ميتنطقش على لسانك... خديجة دي بقت ليا خلاص
قرب عليه طارق و مسكه من ياقه قميصه بعصبية
ملكش دعوه بخديجة يا أمير
شال ايديه ببرود وهو بيرفع حاجبه بتحذير
قولتلك اسمها متنطقهوش تاني
جاي تنتقم صح...ابوك مات و كتب الشركة الام تحت ادارة اختك فريال و سارة اتجوزت من كام يوم حسيت انك خسرت و جاي تحرقنا صح
هنتقم من مين... منك انت يالا
دا انت كنت فاكرك بعتني مقابل حاجة عليها القيمة
قولت هرجع الاقيك عندك شركة في الاخر طلعت مدير حسابات شركتي
بذمتك مش مكسوف من نفسك وانت واقف قدامي كدا
أمير...
اسمي أمير بيه
قالها بصوت جهوري
و دلوقتي حالا تطلع من مكتبي و تروح تكمل شغلك بدل ما تترفد خالص
دخلت الشركة لقيت الموظفين كلها بتبص عليا بطريقة غريبة
فكرت في حاجه غلط في شكلي او شعري
دخلت مكتبي و انا ببص ع نفسي في المراية
استغربت اللي حصل لكن اتجاهلته
وبدأت شغل لحد ما قاطعني رنة موبايلي
الو يا مريم
خديجة اللي في الاخبار دا بجد
اخبار ايه يبنتي
صورك انتي و أمير الملاح مغرقة السوشيال
ايييييه
يتبع
