رواية بنت الكهوجي (كاملة حتى الفصل الأخير) بقلم أحمد
المحتويات
نحتاجها
سكت وسحب راسي لحضنو ومو عارف شيجاوبني لان هو يريد احد يواسيه بهالمصيبة ومبين عليه الانكسار بفقدان ماما
ام فائق خوية ابو باسم النسوان غسلنها وكفننها اذا تريدون تودعوها قبل الدفنة
ياقوت من سمعتها حجت هيج عفت بابا ورجعت ركض للغرفة اول ما دخلت جانو يشدون الخيط مال الكفن الي من يم الرجلين
گعدت عند راسها واخذت راسها بحضني وصرت ابوسها وابجي وحاضنة راسها واحس الشهگة تجرح حلگي من تطلع مني
ماعرف بابا وباسم شنو جانو يحجون جنت اعرف شي واحد وهو انو حاضنة راس ماما المتوفية وبعد شوية راح يحرموني منها
وصلت الى اصعب لحظة بحياتي من مسك ايديني بابا علمود يفتحهن عن راس ماما وياخذوها مني هنا من صدگ تخبلت رسمي
ياقوت لا لا ا باباااااا لااااا بابا لا تاخذوها فدوة فدوة بابا لا تاخذون ماما لا تاخذون امي فدوة عوفوها لا تاخذوها مني
بابا بابا دا ياخذوها بابا احجي وياهم بابا اخذوها بابا فدوة فدوة لا ياخذون امي فدوة بابا لا ياخذوها باباااااا باباااا
لااااا لاااااا لا تاخذون امي مامااا مامااااا عوفو امي لا تاخذوها عوفوها يا ظالمين اريد ماما لا تاخذوها فدوة بابا رجعوها الي فدوة بابا
بعدها فقدت الوعي وماعرف شگد بقيت فاقدة الوعي ومن گعدت جنت مثل السكرانة دايخة وماعرف وين اني وشنو صاير
جانت ام فائق گاعدة يمي من شفتها تذكرت الي صار ودمعت عيوني وماگدرت اتحمل حطيت ايديني على وجهي وانفجرت بالبجي
ام فائق شوفي ماما اعرف فقدان الام كلش صعب وبالاخص لبنت صغيرة مثلج بس انتي لازم تكونين قوية علمود ابوج واخوج باسم
اني راح ابقى وياج لحد ما يخلص العزا بس بعد العزا لازم تكونين انتي ست البيت وانتي تشيلين ابوج واخوج لان ما الهم غيرج
كوني قوية علمودهم انتي ذكية وشاطرة ومتأكدة بس تتحملين فقدان امج الله يرحمها راح تصيرين احسن واحلى ست بيت
وهسا گومي اگعدي ويا النسوان لان اجن يعزنج واجبج هسا تگعدين وياهن يلا بنيتي شدي حيلج وتوكلي بالله امج راحت عند رب غفور رحيم
جان كلامها شوية بيه فائدة گمت لبست ثوب اسود وشال اسود وطلعت وياها خارج الغرفة جانت الصالة مليانة نسوان
بدن يعزني ويواسني وفعليا جنت تايهة بينهن ماعرف شنو اتصرف لان اول مرة اتواجد بعزا ويكون العزا ببيتنا يعني الناس جايين علي اني
بس جان وجود ام فائق مخفف علي شوية وبقيت وياها بقيت صافنة وذكريات امي تنعاد گدامي ودموعي ما توگف بس ابجي بهدوء
واكثر شي اتذكرو من گلتلها من باجر ما اريدج تشتغلين وهي تگلي بضحكتها الحلوة صار استاذة ياقوت كأنو جان الموت منتظر هالكلمة
مر اليوم ماعرف شلون بس لا اكلت ولا شربت شي نهائيا ما الي نفس بكلشي وبقيت گاعدة ويا ام فائق لليل لحد ما راحو الناس كلهم
فجأة دخل باسم يركض وبابا وراه واجى باسم ركض گعد گدامي وهو يأشر للباب ويصيح امه امه يعني ماما ما اجت
باوعت لبابا وكأنو باسم ذكرني بموت ماما ورجعت انفجرت بالبجي وهو اجى گعد يمي واخذ راسي بحضنو وتشكر من ام فائق وهي راحت
ادم بنيتي ياقوتتي
ياقوت ببجية .. ها
انتبهيلي بنيتي اريد احجي وياج
شنو
شوفي بنيتي اني وانتي وباسم ما بقى النا غير بعضنا لازم نساعد بعض ونكون لبعض لان ما نگدر نتحمل فراگ امج اذا ما اهتمينا ببعض
وبالاخص اخوج باسم هو اكثر واحد يحتاج مساعدة فاريدج تكونين وياه بكل شي يحتاجو منج لان ما الو غيرج
بس بابا شلون راح اداوم واعوفو وانت تطلع للشغل
منا لوقتها الله كريم هسا اخذي اخوج ونامو ورانا گعدة من الصبح
تمام يلا باسم
باسم امه امه
ادم روح ابني نام امك بعدين تجي
باسم رفع كتوفو يعني مو راضي امه
ياقوت باسم حبيبي تعال نام ومن تگعد تجي ماما
جان قافل كلش اخير شي راح لفراش ماما تمدد بيه وبقى يبجي لحد ما نام واني بسبب تصرفو بجيت لحد ما ورمن عيوني
اخير شي رحت لفراشي وبقيت ابجي واني اتذكرها لحد ما نمت والليل كلو افز وانام وابد ما ارتاحيت بنومتي وحلمت هواي احلام بس نسيتهن كلهن
ثاني يوم گعدت من الصبح راسي مسطور وكارهة الدنيا كلها بس انجبرت اگوم من فراشي لان راح يجونا ناس يعزونا فلازم اگعد
طلعت من الغرفة جان بابا گاعد على كرسي بالحوش وساكت
بعدها سويت ريوگ لبابا وباسم وحطيتو الهم وعزلت الغراض الزايدة علمود ما يكون البيت مخبوص من يجن علينا النسوان
بابا اكل لگمتين وعاف الاكل وحاول وياي الا تعب علمود اكل بس ما اشتهي احس نفسيتي منتهية لگمة وحدة ما اريد احط بحلگي
من خلصو ريوگ اخذ باسم وياه وطلعو واني اخذت المواعين للمطبخ غسلت الي غسلتو وشلت الي بيه اكل وبين ما خلصت اجت ام فائق وبناتها
اخذتني وياها والبنات راحن للمطبخ علمود يسون جاي للخطار وگعدتني وياها بالصالة وصارت تنصحني وتحاول تقويني علمود بابا وباسم
جان كلامها كلش حلو بس تعرفون فقدان الام ما يهون بهالسرعة وكل ما يتذكرها الانسان حتى اذا ما يبجي عليها تدمع عيونو
بلشن النسوان يجن بس وضعي شوية احسن من البارحة والي يسأل اگولو گعدت لگيتها متوفية وهي نايمة لان جانت مريضة
وكلش يستغربون من اگللهم ماعرف شنو مرضها لان جانت تاخذ علاجات بس صراحة ما جنت اعرف شنو مرضها كل الي جان يهمني انها تتحسن
مر ذاك اليوم طبيعي مجرد عزا وناس رايحة وناس راجعة بس وقت الضهر جبرتني ام فائق عالاكل واكلت شوية علمود ما اخجلها
بالليل هم راح باسم نام بفراش ماما واني كالعادة شبعت بجي قبل النوم ومن ثالث يوم بعد محد يجي لان معارف بابا وماما كلش قليلين
ام فائق ابد ما قصرت وحلفتني اي شي احتاجو انطيها خبر وتشكرنا منها اني وبابا لان وگفتها ويانا من صدگ ما يسويها ياهو الجان
موت ماما كسرنا كلنا بابا طول الوقت صافن ومرات تنزل دموعو خلال صفنتو واني نفس الحالة وباسم كل ما تذكرها يصيح امه ويبجي عليها
ما جان يعرف شنو يعني موت ولا جان يعرف ماما وين راحت ونخاف لا نحجيلو ونجرحو بعد اكثر لذلك نگلو بعدين تجي
باليوم السابع لوفاة ماما رجع بابا لشغلو لان يعتبر تأخر هواي عنو وجان يشتغل عمالة لذلك لازم يروح يوميا علمود يگدر يجمع مصرفنا
اني اهتميت باللبيت وجنت احاول گد ما اگدر اكون على قدر المسؤولية وما اقصر ويا بابا وباسم لان اني الوحيدة الي يگدرون يعتمدون عليها حاليا
بعد ما راح بابا للشغل گعدت باسم وحطيت الريوگ بس بوقتها جنت ناسية لا اسوي بيض فمن حطيتلو الريوك ما اكل كلشي
حطيت كوعي على ركبتي وحطيت راسي على ايديني وابتسمتلتو رغم الحزن الي تارس گلبي .. شتريد يا روح خيتك انت
ابه بيض
لعد گول احبج
ابج
يمة اروح فدووووووووووووة انيييييييي نعل ابو الي ما يحبك
ضحكلي ضحكة جانت تسوى عندي الدنيا كلها وگمت علمود اسويلو بيض لان مستحيل يطلب شي وما يتنفذ
ورحت سويتلو بيض وحاولت بذاك اليوم اللطف جو وياه خطية هو ما يعرف شي ما اريدو يبقى حزين مثلي
من رجع بابا من الشغل وشاف باسم دا يضحك وياي كلش فرح لان اي واحد بمكانو يشوف اولادو هيج راح يكون فرحان
واكثر شي فرحو انو صرنا نهتم ببعض ودا نحاول نتجاوز وفاة ماما مع بعض وهذا الشي جان امنية بالنسبة الو ودا يشوفها تتحقق
في مكان اخر
اگلك ايمتى نسويها
اني راقبت ابوها وعرفت ايام شغلو بعد باجر عندو اجازة مال جمعة ويوم السبت لان اول يوم بالاسبوع فاكيد ما يرجع للمغرب
ليش ما نروح باجر
مو باجر خميس احتمال يصير وياهم شي بالشغل ويلگوها حجة بعد تعب الاسبوع ويرجعون
اني مو مرتاح لروحتنا بوجود اخوها
شبيكم انتو جبناء احنا ثلاثة وهم ثنين واصلا اخوها تالي واحد منغولي راح ناخذ ويانا منوم نخدرو بيه واحنا نشوف شغلنا وياها
واذا صرخت واحد سمع صوتها
احنا من ندخل للبيت نراقبها ونختارلنا لحظة نفاجأها ونسكر حلگها ونخوفها انو نكتل اخوها اذا حجت شي وبعدها نسد حلگها بوصلة وهاي هي
بس ليش هيج مصمم عليها انت
لك شفتها مو بنية ولك كارثة تدري بقيت صافن عليها وما ادري بنفسي اول مرة اشوف بنت بجمالها واذا ما حصلتها اتخبل
لا تخاف راح نحصلها كلنا يوم السبت
وهو هيج هالمرة راح نكون كلنا ويا بعض بنفس الوقت
هههههههههه تريد تكتل البنية انت
لا نداريها معليك
ههههههههههههههاي خوش مدارات
ياقوت گعدت يوم الخميس ورحت فورا لغرفة بابا وماما جان باسم نايم بمكان ماما لان ما يقبل يعوف مكانها وبابا نايم بمكانو
گعدت بابا علمود الشغل
ادم ياقووووت
ياقوت ها ها بابا وياك
صار ساعة احجي وياج
اسفة بابا جنت صافنة محتاج شي
شبيج صافنة وملامحج متغيرة
ماكو شي بس شوية ضايجة
وشنو الي مضوج بنية ابوها
ماكو سبب محدد هيج مجرد ضايجة
اكيد ماكو شي
اي والله بس شرايك تبقى اليوم ويانا اني وباسم
والشغل
تروح يوم السبت
صفن شوية .. هاي هي تدلل بنيتي
يمممممممةة اروح فدوة لباباتي .. وگمزت عليه وحضنتو
صرنا نضحك ويا بعض على ردة فعلي وبقينا يوم الخميس والجمعة ويا بعض بس وقت صلاة الجمعة عافنا بابا وباقي الوقت ويانا
جنا نتشاقة ويا باسم ونشبع ضحك عليه وهو هم يشاقينا ومن صدگ اول مرة نتونس اني وباسم هيج ويا بابا لان قبل ملتهي بالشغل
جنت اضحك وماعرف شنو منتظرني باجر وعلى گولة اهلنا يا غافل الك الله جان همي انو استمتع باللحظة لان ابد ما توقعت هيج يصير وياي
خلص يوم الجمعة بهدوء وراحة مو طبيعي ولاول مرة انام بدون ما ابجي وابلل المخدة بدموعي على ماما وذكرياتها وياي
اجى يوم السبت وياريتو ما اجى لان اجت وياه فاجعة من صدگ حطمتني وكسرت شكو ذرة سعادة باقية بگلبي گعدت علمود اگعد بابا للشغل وغيري گعد علمود ينفذ مخططو
........... يتبع
لايك وتعليق حلو مثلكم
حطولنا ارائكم وتوقعاتكم
حساب الواتباد ahmed_19_98
بيج الفيسبوك zty 413
ضيفوني انستا zty 413
بنت_الگهوجي. 3
بقلم احمد
البارت_3
ياقوت خلص يوم الجمعة بهدوء وراحة مو طبيعي ولاول مرة انام بدون ما ابجي وابلل المخدة بدموعي على ماما وذكرياتها وياي
اجى يوم السبت وياريتو ما اجى لان اجت وياه فاجعة من صدگ حطمتني وكسرت شكو ذرة سعادة باقية بگلبي گعدت علمود اگعد بابا للشغل وغيري گعد علمود ينفذ مخططو
ياقوت بابا يلا گوم تريگ علمود تروح لشغلك
ادم يلا بوية گايم
ياقوت عفتو وطلعت من الغرفة وگعدت انتظرو بين ما صلى الفجر واجى تريگ قبل ما يكمل گال شنو رايج بشغلة گلتلو شنو
ادم شنو رايج نروح نزور قبر امج
صدگ والله
بابتسامة .. اي والله
اي اي اي موافقة احلى اقتراح هذا
لعد گومي گعدي اخوج علمود تتريگون ونطلع سوا
خاف باسم ما يقبل يرجع
لا نقنعو ونرجعو
يلا هسا اگعدو مثل البرق
رحت ركض على باسم گلتلو بسومي گوم خلينا نروح لماما .. باسم .. باااسمممم يلا گوم لا تبقى نايم
هزيتو بقوة .. باسمممممم .. مديت ايدي بخوف على رگبتو وهنا جان الفاجعة جان گلبو متوقف وهو نايم مثل ماما
لا لاااا لااااااااا لااااااااا باسممممممم لاااااااا باباااااا بابا باسم باباااا للااااااا باسمممممم
اجى بابا خايف على صوتي ومد ايدو على رگبة باسم وعرف انو متوفي ومن صدمتو وگع على ركبو ويريد يتحرك ما يگدر
اني صرت ابوس ايد باسم واترجاه يگعد علمود نروح نزور ماما وهو نايم ومغمض عيونو الحلوة دفنت وجهي بصدرو وانفجرت بالبجي
الجيران على صوتي اجو دگو الباب وگوة ابوي راح فتحو وما حسيت الا اجى ابوي سحبني منو علمود ياخذونو يغسلونو ويدفنوه
لا لا بابا عوفني فدوة كافي اخذتو امي لا تاخذون مني باسم فدوو اادفنوني وياه بس لا تاخذونو مني بابا فدوة والله اموت بدونو
بابا بابا والله اسوي اي شي تطلبو مني والله اسوي اي شي بس عوفو يمي فدوة عوفوه والله اموت اذا اخذتو مني فدوة بابا عوفوه
سحبني بابا لزاوية الغرفة ولفني بحظنو علمود ما يشوفوني الشباب الي دخلو ياخذون باسم ومن اخذوه تخبلت عقل ما بقى براسي
رجعووووه لا تاخذون اخوي عوفو اخوي لا تاخذونو مني باسسسممممم باسممممم بابا لا تسمحلهم ياخذون باسم مني
اجت ام فائق تبجي اخذتني لحظنها وبابا عافنا وطلع اوووووف يا احساسي بذيج اللحظة الله يشوفو لبشر من صدگ اصعب من الموت
احسهم اخذو قطعة من جسمي وگلبي كأن محترك بنار ويوجعني وجع مو طبيعي جنت متخبلة واترجى ام فائق ترجعلي باسم
جنت عايشة على امل ان باسم يخفف علي من فقدان امي بس هسا صار فقدانهم ثنينهم علي وثنينهم حرگو گلبي
اخير شي خارت قواي وماگدرت ابقى واگفة وگعدت بالگاع وبقت يمي ام فائق وبقيت ابجي بحضنها وضايعة
ماعرف شگد مر وقت الى ان اجى بابا سحبني من حضن ام فائق ومسك وجهي بايديه وباسني بگصتي وگال تريدين تودعيه
هزيتلو راسي بمعنى اي ورحت وياه جانو حاطينو على مستطيل حديد يسموه محمل يحطون عليه الموتى وينقلونهم للمقبرة ولافينو بالبطانية مالتو
فتحت البطانية جانو مكفنينو مثل ماما ومو مبين منو كلشي صرت اتلمس وجهو والشهگة احسها تجرح حلگي من الحسرة عليه
گلتلو جنت محتارة شلون نقنعك ترجع من المقبرة وتعوف ماما هناك بس ما توقعت تروح الها وتعوفني وحدي هنا
مو تدري بماما عافتني وحدي ليش هيج انت هم تعوفني مكسورة وتروح ليش تبجيني وتلوعني بفراگك ليش هيج حطمتني
جنت اريد اي شي يخفف علي الاحساس ماكو اخير شي صرت اضرب نفسي كل قوتي علمود تهدأ النار الي بصدري ومسكني بابا قبل ما اذي نفسي
حضنتو وگلتلو ثنينهم عافوني وراحو ثنينهم حرموني من شوفتهم ومن ضحكتهم گال اعرف يا بوية والله اعرف بس شبيدي اني
طبو الزلم شالو المحمل واني من بعيد مادة ايدي على امل انو يرجعلي ومفحطة بجي بحضن بابا الى ان طلعو وغاب عن نظري
بعدها عافني بابا علمود يحظر الدفنة واني عفت ام فائق ورحت لغرفتنا اني وباسم طلعت ملابسو وحضنتهن وانفجرت بالبجي
ام فائق ما جانت تگدر تسوي شي لان بوقتها ما جان يفيد وياي الحجي فوگ مصيبة ماما اجت مصيبة باسم وطيرت عقلي من صدگ
كرفصت فوگ الفراش واني ابجي وام فائق گاعدة عند الباب تباوعلي وتبجي على حالتي اخير شي اجت وحدة من بناتها عليها
البنت ماما النسوان بلشن يجن اني وياسمين بلشنا بالجاي روحي گعدي يمهن
امها شلون اروح واعوف هالمگرودة هيج
الله يعينها ماما والله گلبي يوجعني عليها ياريت اكو كلام او شي يخفف عنها
روحي انتي كملي الجاي ويا خيتج واني راح احجي وياها بلكي تقتنع وتطلع تگعد وياي عند النسوان
تمام ماما بس لا تضغطين عليها
تمام
راحت بنتها تكمل الجاي وهي اجت يمي گعدت وسحبت راسي لحضنها وصارت تمسح على راسي بهدوء وحسيت لمساتها كلش ريحتني
ام فائق اسمعيني بنيتي اعرف المريتي بيه والدا تمرين بيه صعب كلش ويجوز لو اني بمكانج جان صار بي شي وما گدرت اتحمل
بس مع ذلك اطلب منج شوية صبر وثقة بالله علمود تتحملين الي صار اخوج انتقل لرحمة الله وهو هسا اكيد سعيد هناك
الي مثل اخوج من صدگ نيالو لان راح يوگف گدام ربنا ويحاججو على التقصير بالعبادة لان ربنا ما انطاه عقل كامل وبدون اي حساب او عذاب يدخل الجنة
تخيلي انتي يكون موقفج هيج تعيشين كم سنة هنا وبعدها تنتقلين لرحمة الله وفورا للجنة وربنا ما يحاسبج على تقصيرج نهائيا
صدگيني ماكو اي شي ممكن يصير ويا الانسان احسن من هالشي فتوكلي بالله وگومي وياي عند النسوان لان اجن علمودج انتي
ياقوت ليش ربي يخليني ابجي دائما
استغفر الله شنو هالحجي بنيتي
بالبداية اخذ ماما وخلاني يوميا ابجي عليها وبعدها اخذ باسم وراح ابقى يوميا ابجي عليه
زين راح اوضحلج فد شغلة وانتي احكمي
تخيلي تكونين بموقف ما تعرفين ان ابوج يحبج لو لا وانتي بنفس الوقت تحبيه بس تريدين تتأكدين من حبو الج بهاي الحالة شلون تعرفين
ماعرف
بهاي الحالة تختبريه بفد موقف او شي والله سبحانه وتعالى يسوي نفس الشي ويا عبادو الي يحبهم وركزي على كلمة يحبهم
يسويلهم اختبارات مثل فقدانج لامج ولاخوج علمود تصبرين وتتوكلين عليه واذا صبرتي وتوكلتي عليه راح يحبج بعد اكثر
يعني فوگ ما باسم يروح للجنة انتي تصبرين وتحصلين محبة الله عز وجل فماكو افضل من هالشي صدگيني
ياقوت بقيت ساكتة وبس دموعي تجري مثل الشلال اختبارو كلش صعب بالاخص بعد ما فقدت ماما شلون ابقى بعد بالبيت لحالي من يطلع بابا
بعدها سحبت راسي ام فائق وباستني بگصتي وگالت گومي غسلي وجهج وتعالي اگعدي يمي ويا النسوان عيب تأخرنا عليهن
جان اكو شال اسود يم الفراش سحبتو وانطتنياه واني من البداية لابسة اسود على ماما لفيت الشال على راسي ورحت غسلت وجهي ورجعت عند النسوان
بوسني كلهن وعزني بوفاتو وكلمة الله يرحمو جانت تاخذ گلبي وياها لان دا تأكدلي انو مات وكأني لحد الان مو مصدگة ان باسم مات
ومثل عزا ماما ساكتة وبس اتذكر مواقفو وياي وابتسامتو
بكل زاوية بالبيت الي الاف الذكريات وياه وويا ماما بقن النسوان يجن ويروحن لليل يلا خلصن ومن اجى بابا ترخصت ام
متابعة القراءة
