رواية جراح قلبي ( كاملة جميع الفصول) بقلم جوهرة
رواية جراح_قلبي. 1__2
للكاتبة_Jawhara
البارت_الاول
بسم الله والحمدلله ولا اله الا الله والله اكبر
بصوت قوي رد على أبوه
محد يجبرني أبوية على راسي وافداك بس تريدني اتزوج واني ماهاوي البنية مستحيل
لا تضل معاند هذا راسك الگوي خل يطخي شوية
لا تضل معاند هذا راسك الگوي خل يطخي شوية
ماعلمتني اطخي راس
جر حصرة وذبها وعينه على ابنه نتر بصوت مرعب منا للعصر اريد موافقتك لا وحك هو الله وهذا يمين طلع من راسي لا انت ابني ولا اني ابوك
كمز من القفنه مثل الملدوغ ياااابة صلي على النبي مو هيج تسويها السالفة
الاب هذا حلفاني وانت بكيفك
عافهم وطلع من المضيف عيون اخوته عليه يشوفونه مثل المخنوك لأن يعرفونه ميكدر يكسر لأبوهم كلمة
مسح على راسه بيده وصفن على اخوته ورجع حجى ..
قسم بالله إذا ما اخليها تندم عالساعة العرفتتي بيها مايكون اسمي ايهم
نهض حذيفة وتقرب تلة من جتفة وعيونه اطك شرار زمخ بي ..
تاكل وحل والله العظيم إذا ايدك مديتها عليها اني اوكف بوجهك شنو انت شكد صلف ماعندك كل احترام للكبار
دفع ايد اخو الجبير ابو ملاك انت اخوية الجبير ماريد اغلط عليك
حذيفة لا والله على أساس محترمنا هسة انت
تنهد وأشر على اخوته الكاعدين وتحديدا صعب ..
ايهم خل صعب يتزوجها هو جبير أني شكو
ياناس ماريدها أفهموني لخاطر الله ورسوله
صعب خال رجل على رجل ويلعب بسبحته بين أصابعه من سمعه هيج حجى خزره ونتر ..
صعب شنو سالفتكم وانت ماتعرفني حتى هيج تحجي جدامي
ايهم ترى مصختها يخوي عمرك بالثلاثين تزوج وفضها
كام صعب وتقدم عليهم وأشر لحذيفه بأصبعه
صعب حذيفة ضبه زين ما وصيك ترى من يطلعن جنوني عليه امسح بي المضيف هذا
عافهم وطلع وبقى ايهم يكمز عصبي يهدد ويتوعد وأخوته حذيفه واياد يقنعون بي
واخر شي قبل بس بداخله افكار سودة
لليل صاح حجي عبدالله على مرته .. ام حذيفة وينج
دخلت الغرفه كول حجي خير ان شاء الله
حجي عبدالله كل الخير باجر ترحين لبيت ام سما تحجين وية بنيتنا تتحضر نعقدلها على ايهم
ضربت صدرها يايمه البنت بعدها تدرس وينها وين الزواج
حجي عبدالله اششش ولا كلمة البنت تتزوج وكل حجي ماريد مفهوم
ام حذيفة ابو حذيفة البنت يتيمه شلك على خطيتها وابنك مايهواها لاتظلمهم اثنينهم
حجي عبد الله يا مرة ورث اخوية ماريده يروح للغريب وماريد واحد يضحك بعقلها خلها هيج احسن وازوجها ايهم العندة مركة زايدة يذبها ع زياجة
سكتت ام حذيفة تعرفه من يدك عناد يسوي الي براسه وتحجي وية نفسها .. اخاف من تهور ايهم ابني واعرفه يروح يأذي البنت شلون يربي اووف موتوني قهر عفية عائلة هيج روس كوية
تنهدت وكامت طلعت من الغرفة تريد تشوف ايهم
دورت بالغرف ماكو طلعت بالكراج شافت صعب كاعد وحده بالحديقة ويدخن نركيله راحت عليه ..
ام حذيفه يمة صعب شو ايهم ماكو بس لا سواها وراح
ذب النركيلة من أيده خلاها عالطبلة وصفن على أمه ممنتبه شنو حجت جان ضارب دالغة وميدري شكو ..
صفكت ايديها بقلة حيلة يحظي احجي وياك من فدوة رحت لهلوجه الحلو شبيك يمة تضرب صفنات !!!!
تنحنح بقوة وأيده على حلكه احمم احمممم
صعب شبيج بعد روحي ليش قلقانة
كعدت بصفه عالكرسي وسحبت فوطتها البيضة عدلت لفتها ايهم ماكو واخاف يروح لبيت عمتك ايمان يتعارك هو ولينا
جر النركيله وسحب راس منها وذبه بالهوا وعيونه مغمضهم للنص ترى ايهم يفكر بعقله صح مرات يتهور بس يعرف مصلحته زين وما اعتقد راح يسوي شي يضوج ابوي
ام حذيفه الله كريم والله يايمة خايفه من هاي السالفة گلبي ناغزني
هز رأسه يطمنها وبداخله متأكد أخوه مراح يعديها سلامات
بيت عمتهم ايمان ام سما
ايهم
عصبي نار اريد اكمشها امرغلها بالكاع ياناس والله ماريدها بس ابوي اااخ منه لوما يحلف علية
دحكت عليها خاتلة بظهر عمتي ايمان انوب ماكدر اخربها ويه عمتي لأن احبها واريد خاطرها بس القهر البگلبي غوش على عيوني وكل عقل ماظل براسي من خزرتني بعينها واسمعها تكول ماميتة عليك
جريتها من ضفيرتها جانت مسرسحة على صدرها لويتها على أيدي وصارت بحظني شلون ظفيرة شطولها وملمسها ناعم حيل
عاطت جان ازمخ بيها
ايهم ولج بالقرآن إذا كلتي اقبل بأيهم الا اراويج نجوم الظهر اشرب من دمج فاااهمه
دفعتها بقوة وكعت بحظن عمتي الي عصبت علية وطردتني من بيتها ..
عمته ايمان سود الله وجهك شلون هيج تعاملها ولك خاف الله بيها بنية يتيمة حرام الجاي تسوي بيها بس العتب على عبدالله هاي أمانة اخونا هيج يسوي بيها امشي اطلع ماريد اشوف جهرتك
سكتت مارديت عليها طلعت من البيت وبجي وعياط لينا يرن بأذني
لينا مجانت ابد على بالي ولا مفكر بيها زوجه لأن ممختلطه ويانا دومها وحدها هي وامها وأكثر شي علاقتها وية بيت خالها العايش بالشمال ومن اهلها انقتلو على ايد عصابة سلابة جانو بوكتها طالعين من ديالى رايحين حتى يجيبونها من بيت خالها وبداخل حدود المحافظه جان الحادث قتل وتسليب الفلوس والسيارة
مرت عالحادثه ثلاث سنين ومن يومها لينا منعزلة أكثر اخذتها عمتي ايمان لبيتها لأن كاعده وحدها ورى مازوجت بناتها الاثنين وحدة منهن سما متزوجة ابن عمي صالح اسمه صلاح موظف بالصحه
رجعت للبيت ومن دخلت تلكتني امي جانت بالحديقة ايهم وين جنت
اعصابي بعدها مفولة لخاطر الكعبة عوفيني هسة
عفتها ودخلت البيت واسمعها تصيح وراي صعدت لغرفتي
يم ايمان ام سما اششش بنيتي لاتبجين يعيوني لاتخلين عيونج الحلوات يحومرن
بشهكه عمة ما نتوالم والله شفتي شلون يباوعلي بحقد مايحبني واني هم ماريده ماحبه
ام سما تعاي تعاي هنا خل نكعد ونسولف براحتنا من فدوة لطولج الحلو
كعدنا على قنفة التخم بالهول وبقت عمة ايمان تسولفلي وكل كلامها حتى تقنعني ارضى بأيهم
ليش اني بيدي شي شو كله الحل والربط بيد عمو عبدالله كلمته تمشي على كل عائلة الناصر ياربي والله مظلومة اني فقدت اهلي ومابقالي شي منهم وانوب ظلموني بهذا الزواج جريت حسرة وذبيتها واني اسمع عمة ايمان ..
ام سما وافقي بنيتي اقلها ابن عمج سند الج
سكتت مارديت عليها وبداخلي مرارة ووجع بس الله يدري بي
لينا الناصر هسة عمري 17طالبه بصف السادس ادبي توفو اهلي وعمري جان 14سنة وبقيت يم عمة ايمان كولش حنينة علية هي جانت موظفه بالمصرف وطلعت تقاعد زوجها متوفي من سنوات
تبرعت تهتم بية وماقبلت عمامي ياخذوني لأن عدهم شباب حسب رأيها ولأن ماعدها أحد رغم ابن عمي عبدالله اسمه صعب اغلب وقته يمها حتى أوقات الاكل موجود ومصرف يذب بالبيت علاقتهم حيل قوية اني مامختلطه بي على كد السلام لو مرات يحتاج شي يطلبه مني بالنسبة إلي استحي منه هو شخصيته قوية انسان جدي وثكل ورزانه ودوم حاجبه معكود مدري شنو سالفته مرة سألت عمة ايمان ليش شكله معصب دوم كالت شيسوي إذا الدنيا معاكسته
بوكتها استغربت عبالي قصدها حالته المادية صعبه شو ماشاء الله سيارة احدث موديل ومكاتب عقارات أموره طاكه اثاري طلع قصدها ماعنده حظ لأن الحبها مدري ألراد يتزوجها طلعت خاينته وية غير رجال هذا الكلام قبل سنوات وبقى مايقبل يتزوج رغم عمره قريب ال 31سنة
الصبح كعدت توضيت وصليت رحت اسوي ريوك عمة ايمان بعدها ماكاعدة انفتحت الباب البرا عرفته صعب لأن دومه يمنا والمفاتيح نسخ وياه رحت فتحت باب المطبخ
صعب صباح الخير
دنكت رديت سلامه ورحت اكمل الريوك
دخل وطلع كبل للهول وصاح عمتي كاعدة
لحكته وبيدي شايلة بيضة اريد اطكها بعدها نايمه تعال تريك هسة اكمل الريوك
حك راسه اي والله بلا كلافه عليج خيتي
لينا ادلل كولشي حاضر
سويت له ريوك وخليته كدامه عالميز بالمطبخ وصبيتله جاي ورحت أصيح عمة ايمان لأن استحي اكعد اتريك وياه الا عمة ايمان موجودة
اسمعهم يسولفون عالشباب عايلتنا وعلى سوالفهم جان عمة ايمان تحجيله شسوى ايهم رفعت راسي واشوفه عيونه فكهن ورأسا صار عصبي ..
صعب طيح الله حظه لينا يابة لا تنقهرين اني اضبه خوش ضبة
سكتت ماحجيت كمت رحت لغرفتي واسمع عمة ايمان عبدالله مايرتاح الا يزوجهم ترى الورث ماطاير
صعب عمة أبوية
ايمان صعب وانت تشوف اختيار ايهم حتى يتزوج لينا وهي بعدها طالبة السنة بكلوريا عدها خوش اختيار
صعب ابوية عنده بعد نظر .. اترجاج عمة لا ادخليني بهاي السوالف ماحبها
ايمان ولشوكت تبقى هيج ترى مرمرت گلبي
استغفر الله خل اروح للمكتب
ايمان كمل ريوك لاتنهزم
صعب واني اكدر انهزم من عمتي حبيبت
صعب
بالمكتب كاعد يراجع عقود شراء دك موبايله
فتح خط هلة والله هلة بضلعي
بالمهلي شلونك شخبارك
صعب الحمدلله .. انت شخبارك شو مانزلت طولت بأجازتك
والله شغل وانت تعرف وضعي لازم نبقى حذرين
صعب ايي الله يحرسكم دير بالك على روحك
معتصم لا توصي حريص والله الحافظ
صعب والنعم بالله .. أكلك معتصم لا تنسى الوصيتك عليه
معتصم هههه شلون انسى قبل اسبوع اشتريتها وموجودة عندي من انزل اجيبها
صعب شوف اخيك بجم شاجور
معتصم ولك تحجي كل عقلك يابة مستحيل أسويها
صعب هههه كفو من ابن عمي كد الامانه مايخون
معتصم الحمدلله .. بس لا تحسب لشي اشتريتلك رصاص انتظرني من انزل .. يلة سلملي
صعب الله يسلمك
سديته من معتصم وكمت اشوف ايهم ليش تأخر مرات يسخت بالشغل اتصلت عليه طلع الافندي رايح هو والحجي بشغلة ومامنطيني خبر
رجعت للمكتب شوي ودك موبايلي
صباح الخير شلونك صعب
صعب هلة بهالصباح هلة بأم صهيب
ام صهيب صعب من الاخير اجيبها صاحبك خل يخاف الله بية كل شهر يلة ينزل اسبوع وين صايرة هاي ميكول عندي مرة وجهال
عدلت كعدتي وبداخلي احاول اتماسك حتى لا اثور بيها رانيا رجلج دوامه هذا بعدين انتي خافي الله شلون كل شهر ينزل الإدري بي كل أسبوعين ينزل اسبوع ومعتصم مامقصر بحقكم لا تصيرين ظالمة
بعصبية ردت ابقى طمطم عليه المفروض توكف وياي اني اختك الجبيرة
صعب اني وية الحق بعدين ابو صهيب خويي لكطع النفس اني وياه والرجال مامسوي شي حتى اطمطم عليه مثلما تكولين
ام صهيب ليش اني انتظره لما يسوي شي خوش والله
صعب ضاج من طريقة كلامها انتي شبيج بابا من الصبح يافتاح يارزاق
اسمعها تنهدت وسلمت وسدته اختي وأعرفها عصبية متتحمل وبنفسه معتصم شكالي منها جم مرة لأن اضايقه بشكوكها وعصبيتها ولخاطرهم ساكت ميريد يسوي مشاكل بالعائلة
قبل الظهر دخل ايهم سلم على صعب وكعد عالقنفه وبيده علاليك ذبهن بالكاع
رفع صعب راسه وردله سلامه وصفن عليه شويه ..
صعب وين جنت والاشوفه مشتري ملابس
ايهم كملنا شغل اني والحجي من وكت ومريت بطريقي لمحلات اياد خوش جايب بضاعه البارحه لكيتهم هو والعمال يرتبون بيهم اخذتلي بنطرون على تي شيرتات اثنين
تريد تشوفهن وحسبت
صعب اي لبسة العافية بس لاتنسى وراك شغل لاتبقى تسرح وتمرح بكيفك
ايهم تعرفني ممقصر بس انت تريدني دوم هنا صعب ترى
