رواية جراح قلبي ( كاملة جميع الفصول) بقلم جوهرة
المحتويات
الواحد هم يتنفس يغير جو يخوي شبيك قافل
صعب بلا نفس تنفس حبيبي تنفس ليش انت مقصر
صعب وعينه عالملابس اكول وهاي دفعت فلوسهن لو غلست
ايهم ههههههه تدري بية مرات اغلس بعدين اياد كال شتريد أخذ واني خوما افشله ميصير
صعب لا صاحب واجب بسلامتك وشكد قطيته هالمرة
ايهم موهواي هههههه
سكت صعب ورجع يدقق بالاوراق البيده صح ايهم ممقصر بشغله ولا مقصر بطلعاته هم مونس روحه عالاخير
دك موبايله ذب الاوراق وعكد حاجبه اليوم مابطل موبايلي شينهاي كلساع واحد متصل
ايهم ديلة باباتي مكتب عقارات وتريد محد يتصل
اشرله بيده بمعنى اسكت ياهلة ياهلة والله بعمي سامي الغالي شلونكم
سامي هلة بصعب الحمدلله بخير انتم شلونكم
صعب بخير والله يا عمي البارحه جنت بطاريك اني والشباب كاعدين بالمضيف نسولف بيك
سامي ولدي واعرفكم ماتقصرون اتصلت الصبح بالحجي وكال يريد يزوج ايهم ولينا اني شجعته خوش خطوة هاي
صعب اكول عمي ايهم كاعد كبالي وفاتح آذانه خل افتح مايك حتى يسمعك لأن داك عناد وانت تعرفه
فتحت المايك وطلع الصوت بالغرفه واضح وعمي يغرد على ايهم ولك وين تلكى احلى واحسن من لينا هاي بنيتنا
ايهم عمي شلونك بالاول شخبارك
سامي زين زين الحمدلله شو ماجيت هذا الشهر للأردن
ايهم من يصير شغل اجي أن شاء الله
صعب رد اي اني ما خليته أريده يشتغل وياي ياعمي ليش تريد تسحبه يمك
سامي هههه ولك صعب ماكو فرق
صعب هههه اي تريده ونس وياك بالغربه
سامي أها خوش حجاية أريده يساند عمه ايهم خوش ايهم معدل وسبع
صعب صدكت ياعمي
رد ايهم على عمه فديتك عمي واني على بالي اجي بس خاف الحجي يسويلي سالفه
سامي لا لاتخاف حجيت وياه كتله اريد ايهم وياي بالشركه يساعدني وليداتي بعدهم صغار منا لسنتين ثلاث يصيرون شباب وهم تتعلم وتصيرلك خبرة بالتجارة
ايهم ان شاء الله عمي
سامي اكلك لاتبقى معاند فوت بفالك وتزوج بنت عمك علي الله يرحمه
تنهد ايهم يصير خير
سامي صعب ترى اتصلت اريدك تجي للأردن شايفلك خوش مرة
مد بوزة معاجبه لأن هاي سالفة اضوجه
عينه على ايهم يركص بحواجبه ويهزله راسه
اشرله بأصبعه يهدد
صعب عمي صدك تحجي تريدني اجي الأردن حتى اشوف مرة واني اصلا قافل عالسالفة كلها
سامي ولك ليش تضيع شبابك والله حرامات يأبه طز بكل وحدة باعت وراحت ورى الرخيص
زادت عكدة حاجبه وصوته خشن عمي ترى سالفة انمحت من عقلي مامفكر نهائي ليش تذكروني بيها حشاك هي وطركة حذائي اترجاك عمي لا تسولف بطاري الزواج لأن مراح اتقبل السالفة واني كاره طاري زواج والنسوان
سامي وتريد تقنعني ماعندك وحدة شاب شخصية وجمال ومال ماوكعت على وحده
صعب اكول عمي يمكن حلمان بية
سامي ابقى صنف يجيك يوم يا صعب وراح تذكر حجايتي يلة سلمولي فيمالله
سده من عمه وذب موبايله عالمكتب تنهد ومسح على راسه
ايهم صعب يخوي انت هم أهدى لا تصير عصبي رأسا
عينه على ايهم عض شفته الجوة وهز رأسه بدون مايرد على اخوه لأن ضاج من تذكير عمه هو ماينكر حب البنت قبل ثمان سنوات جان بعده شاب صغير واستمرت علاقتهم سنه كلها تدري راح يتزوجون لأن خطبها واهلها انطوها جانت جيرانهم بس انتقلوا اهلها بعد الصار من مشاكل
دمه جان فايرهم وماينسى من كامت تصرخ بوجهه متريده وقبلت لأن حالته المادية زينة وكل كلامها عن الحب جان جذب تمثيل وهي من البداية تحب هذا الولد
جانت صدمته بيها جبيرة وبعمر شاب بعده ممكمل الاربعه وعشرين سنة دمه فاير وبكل تهور شال سلاحه وراح لبيت خطيبته يريد يكتلها بنص اهلها وجان نصيب البيت مخزن كامل من رشاشته وزرف الحياطين وكسر جام الشبابيك جان وكت مغربية والشارع كله التم عالصار من هوسة مافضت اسابيع الا شالو اهل البنت من المنطقه لأن هددهم صعب من يشوفها يذبحها
وراها بأشهر وصله خبر زواجها
كرهها كره النسوان وكره طاري الزواج وبقى حاقد مرات يتعجب على روحه من يشوف الشباب متونسين بعلاقاتهم وهو ماعنده أي رغبة حتى يرتبط باي علاقه كانت
مسح وجهه وتنهد اشر لأخوه وهو يكوم من مكتبه ..
صعب ابقى هنا اني طالع
طلع وبقى ايهم صافن عليه يدري بي ضاج واكيد تذكر شي ميحبه
ايمان ام سما يلة بنيتي روحي ساعدي اخياتج حتى تخلصن من وكت
لينا اي عمة ادللي
كمت بالمطبخ ويه البنات جناين عمو عبدالله يخبزن كليجة العيد الجبير مابقى يومين ونعيد عفت عمة ايمان بالهول هي وعمة ام حذيفة وطلعت يم البنات ملتمات بالمطبخ والجهال كلمن يم أمه
كعدت بصف علا تصير بنت عمو صالح وزوجة حذيفة ابن عمو عبدالله الجبير بنتها ملاك بعمر ست سنوات كاعدة ترص بعجينة صغيرة بيدها وتطبع بقالب صغير سحبت القالب وكعدت اطبع هي بقت صافنه علية وعاكدة الحاجب يمة جنها عمها ايهم شلون عيون هههه
علا يلة يلة عفية ليونة حتى نخلص
لينا اكلج علا شدعوه هلكد عجين
علا يمعودة مايبقى اسبوع خطار وهنا البيت كلها تحبها
ادحك على زوجة اياد تتأفف ضحكت ودغيت علا اشرتلها
علا اول تالي تخلص مو شهد هههه
شهد اووي علا والنبي اضوج من نسوي كليجة تعب تعب
علا خل تسمعج عمتي حتى تبقى تغرد
علا حيل حبابة وعلاقتي بيها زينة حتى شهد بس اني مو هلكد اتقرب عليها رغم البنية زينة
شهد زوجته لأياد وهي من المنطقه اهلها نازلين نفس الشارع اللي بيت عمو عبدالله
شوية ونترت شهد بالجهال لأن ضوجوها هي جهالها اثنين صغار تلث سنوات وسنة ونص
ولدين عدها وكاعدين بمشتمل بصف البيت حتى سياج ماكو بيناتهم
بيت عمو عبدالله جبير طابقين وبنائه حديث قبل كم سنة بنو حذيفه الجبير محتل الطابق
كملنا وصار العصر دخل ايهم هو وصعب سلمو ودخلو اني جنت كاعدة بصف عمة ايمان رأسا انحشكت بسدها ودنكت راسي هي حست علية ذبت الاستكان عالطبلة
ايمان خل نروح بعد كليجه وساعدناجن وضيافه وضيفتونا
ام حذيفه ابقن اليوم عالعشا شعندج بالبيت
ايمان والله يا ام حذيفة اريد اطلع للسوك اشتري ملابس لينا
ام حذيفه شعجب باقية مامشترية
ايمان متقبل تشتري منا الا من بعقوبة
ام حذيفه هسة تليل الدنيا وانت هناك
انتبهت لصوت ايهم دخل للمطبخ ومبين سمع الحجي ..
ايهم ماكو روحه ساعة وتغورب
عمة ايمان ردته سيارة جيرانه يبقى ويانة متعلمين عليه ناجره
ايهم عمة لاترحين شنو لزوم الا هسة بقت ماعدها ملابس لو تذبح روحها عالتفرفر
خزرته بعيني من سمعته هيج حجى وكلت لعمتي خل نروح للبيت فدوة
كمنا نريد نطلع جان ينتر بية اسمعي لج ممنوع ترحين
سكتت اني بس عمة ردته ..
ايمان شوكت متصير مسؤل عليها ذاك الوكت احجي
ايهم عممة انتي بكلامج هذا راح تكون عينها
ايمان ستغفر الله يارب تالي وياك هاي هم قبل يومين من ضربتها وسكتت ماوصلتها لابوك خل نروح مابية حيلكم بيت عبدالله الناصر هسة يسمع صعب وتكبر السالفة
طلعنا اني وعمتي ايمان وطلعت علا وعمة ام حذيفة عبالهم زعلنا يتوسلن بعمتي ترجع
بس ماقبلت وكالت مازعلانة
طلع صعب من غرفته وصاح على ايهم ..
ايهم إذا تحجي علية من هسة اكلك مابية حيل ترى اعصابي تعبانة والله
صعب مو عيب هيج تحجي وية عمة ايمان بعدين لينا انت شاد وياها متقصد شنو جاي تعلمني بيك تريد اطلع قهرك بيها
ايهم والله اطيح حظها لان السالفة مجاي اتقبلها افهمني صعب ماريدها يا اخي نفسي متتقبلها
صعب انت شبيك شنو ماتتقبلها نفسك البنت وردة الله يستر عليها وأخلاقها كلنا نعرفها تربيتنا بعد وما مقبول كلامك هذا
بعد الزواج تتغير نظرتك تكوم تحبها تموت عليها من تصير بحظنك
غمزلة بعينه وابتسم خلاه فاك حلكه متفاجىء بأخو
شنو هالحجي هذا وهو مايحب النسوان ولا يحب طاري زواج وهيج يسولف والله صعب ما تنحزر
عافه وطلع صعد لغرفته
حبايبي صوتو للرواية دوسو النجمه وعلقوا لاتنسون اكتبو
شكرا على التصويت!
الثاني
رواية_جراح_قلبي
للكاتبة_Jawhara
الثاني
سبحان الله وبحمده سبحان الله العظيم
صعب
فزيت من النوم وأحس گلبي يريد يطلع من بين ضلوعي مسحت على وجهي واني بعدني اسير الاحساس القيدني بالحلم تعوذت من الشيطان وكمت حتى اتوضى واصلي الفجر
بس شنو عقلي بعده يفكر بالحلم
صليت وظليت اقرا قرآن بعدها صدقت ورجعته بالمقرأة ورحت مددت بفراشي تنهدت وغمضت عيوني وخيال المرأة الشفتها بالحلم
تنرفزت وبقيت اردد الاستغفارات وتسابيح إلى أن غفيت
تعالو شوية هنا وعوفكم من صعب جان حلمان خل نتعرف على بيت الناصر عائلة جبيرة يسكنون محافظه ديالى بناحية تابعة لقضاء بعقوبة
عبدالله الناصر أبو حذيفة وام حذيفة
اولادهم ..
1_ حذيفة أكبر اولاده عمره 35 سنة زوجته علا بنت عمه صالح الناصر وبناته ملاكسنوات جنات 6سنوات محمد 4سنوات
شغله موظف بديوان المحافظة
2_ صعب الابن الثاني عمره 34سنة اعمال تجارية ومكتب عقارات
3_اياد 32 سنة خريج معهد إدارة عنده محلات ملابس رجالية متزوج شهد بنية من منطقتهم جانت طالبة وياه بالمعهد عنده اسد 7سنوات وازل 5سنوات امين سنتين
4_ايهم عمره 30سنة تجارة بين العراق والاردن خريج إدارة واقتصاد وراح يتزوج لينا بنت عمه علي
5_رانيا 37سنة البنت الجبيرة متزوجة من ابن عمها معتصم وعدها ولدين بعمر 17_15 وبنت 12سنة
بيت عمهم صالح الناصر أبو معتصم وام معتصم
1_معتصم مقدم بالداخلية يداوم بغداد زوجته رانيا بنت عمه عبدالله
اولاده صهيب 17سنة ونذير 15 ورونق 12سنة
2_مصطفى عمره 34 منتسب بالجيش متزوج من اقربائهم ومستقر أبيت بصف بيت أهله وعنده أربع ولد
3_علا بنتهم زوجة حذيفة 30سنة خريجة كلية
4_رنا بنتهم الثانية متزوجة بغير منطقه بس داخل ديالى
5_ صلاح عمره 28 موظف بالصحة متزوج من بنت عمته ايمان زوجته سما وعنده ولد واحد
6_ صفا عمرها 24 سنة معلمه بمدرسة أهلية
عمهم علي متوفي الله يرحمه هو وزوجته
بنتهم هي لينا ومن تتحدث عن حياتها جانت بعمر السنة
ومن تمضي السنين راح تكون بعمر 21سنة
يعني الأحداث الجاي تصير هاي قبل أربع سنوات واعمار الابطال جانت اصغر من الي كتبتها بأربع سنوات
العمة اميرة الناصر الاخت الجبيرة متزوجه وعدها ولد وبنات متزوجين ومستقرين
عمرها 57سنة
العمة ايمان الناصر عمرها 55 سنة متقاعده جانت موظفه بالمصرف تقاعدت برغبتها
بناتها سما زوجة صلاح ابن خالها صالح
وبنفس الشارع بيتها والثانية ربى متزوجه بس بغير حي ساكنه
العم سامي الناصر مستقر بالاردن هو وعائلته عنده ولد اثنين بس شباب صغار بعدهم
هذا اصغر اخوته عمره بالاربعينات
وتبقى عندي بطله راح تظهر بالبارتات القادمة مراح اتحدث عنها خلها مفاجئة
هسة تعرفتو على عائلة بيت ناصر نرجع نكمل
معتصم
نزلت لديالى موعد اجازتي تسوكت للبيت وأخذت غراض للجهال وصلت جان وكت غدا اول ما دكيت هورن وطبكت سيارتي ودخلت تلكوني ولدي فرحانين من شافوني بوستهم لصهيب ونذير واجت رونق تركض شلتها بحضني وبقيت ابوس بيها حبيبة ابوها هاي
صهيب عمرة 13ونذير 11 ورونق 8سنوات
انطيت السويج لصهيب
اجو ولد مصطفى ماشاء الله عبالك توم ثلاثتهم
سلمت جانو كاعدين يشربون جاي كام أبوية بوجهي
متابعة القراءة
